Dende Maleducadas
decretamos unilateralmente o Ano 2014 como Ano Maleducado "Luísa Villalta" en memoria dunha
persoa exemplar que nunca se rexeu polas normas de conduta que a sociedade
estimaba como axeitadas, senón polo que a vida lle pediu en cada momento: compromiso
coa muller, amor pola súa terra, idilio coa lingua galega, paixón pola música, relación
treboenta coa literatura, refuxio no verso...
Así pois, a nosa
intención será dedicarlle cando menos unha vez ao mes un espazo a diferentes
camiños que Luísa percorreu no seu traxecto vital que desafortunadamente se viu
abruptamente interrompido fará dez anos este marzo, cando contaba con só 46
anos de idade.
Nada mellor para
introducirvos a ela que o emotivo documental Luísa Villalta: paixón e compromiso, realizado por Gallaecia Films,
a productora audiovisual do Instituto Isaac Díaz Pardo de Sada, onde Luísa, natural da veciña cidade da Coruña, impartiu clases de lingua e literatura galegas por longos anos.
Contamos con poder ofrecervos en breve unha guía biobibliográfica da autora, pero mentres podedes ir coñecendo a súa obra e biografía a través das ligazóns que adxuntamos:
- Luísa Villalta (1957-2004) (Asociación de Escritor@s en Lingua Galega)
- Luísa Villalta (1957-2004) (Biblioteca Virtual Galega)
- Luísa Villalta (Galipedia)
